काठमाडौँ । सानिमा बैंकको प्रमुख कार्यकारी अधिकृत (सीईओ)मा निश्चलराज पाण्डे नियुक्त भएका छन् । निवर्तमान कार्यकारी अधिकृत भुवनकुमार दाहालको कार्यकाल सकिएसँगै पाण्डेले सानिमा बैंकको बागडोर सम्हालेका हुन् ।
भुवन दाहालको आगमनसँगै 'क' वर्गको बैंक मध्येमा सानिमा बैंकले फड्को नै मारेको जानकार बताउँछन् ।
बैंकको सञ्चालक समितिले पाण्डेलाई आगामी माघ १२ देखि लागू हुने गरी प्रमुख कार्यकारी अधिकृतमा नियुक्त गरेको हो ।
बैंकिङ्ग क्षेत्रमा २६ वर्ष लामो अनुभव संगालेका पाण्डे यसअघि नविल बैंकमा १८ वर्ष काम गरिसकेका छन् । २०७० सालदेखि सानिमा बैंकमा कार्यरत पाण्डेले असोज २०७८ देखि बैंककै नायव प्रमुखकार्यकारी अधिकृतको रुपमा जिम्मेवारी निभाउँदै आएका थिए ।
फाइनान्समा एमबीए गरेका पाण्डेले कर्जाको विषयमा राम्रो विज्ञता राख्नुका साथै बैंकको प्रमुख जोखिम अधिकृत र प्रमुख कर्जा अधिकृतको जिम्मेवारी समेत निभाइसकेका छन् ।
