काठमाडौं । अकस्मात परेको झरीका कारण गत शनिबार साँझदेखि अवरुद्ध रहेको बीपी राजमार्ग सोमबारदेखि सञ्चालनमा आएको छ । रोशी खोलामा आएको बाढीले डाइभर्सन बगाएपछि यातायात अवरुद्ध भएको थियो । तीन दिनसम्म अवरुद्ध खण्ड मर्मत गरेपछि सञ्चालनमा आएको हो ।
सडक डिभिजन कार्यालय र ठेकेदार कम्पनीको सहयोगमा क्षतिग्रस्त डाइभर्सन मर्मत गरी यातायात पुनः सञ्चालनमा ल्याइएको हो ।
शनिबार रोशी खोलाको बाढीले चौकीडाँडा, घुमाउने, चारसय बेँसी, गिम्दी बेँसी, नार्के, चिउरीबास, बोक्सीकुना, कालढुंगा,डालाबेँशी, बुलढुंगा तथा माम्तीमा डाइभर्सन बगाएको थियो भने सिन्धुलीतर्फ आँपघारी र नेपालथोकमा डाइभर्सन बगाएको थियो ।
