काठमाडौं । लागूऔषध मुद्दाका प्रतिवादीलाई धरौटीमा छुटाइदिने प्रलोभन तथा आश्वासन दिई रकम लिएको आरोपमा दुई जना व्यक्ति काठमाडौं जिल्ला अदालत परिसरबाट पक्राउ परेका छन् ।
काठमाडौं जिल्ला अदालतले आज जारी गरेको प्रेस विज्ञप्तिअनुसार लागूऔषध (खैरो हेरोइन) मुद्दाका प्रतिवादी विमल घलेलाई धरौटीमा छुटाइदिने भन्दै उनकी पत्नीबाट अवैध रूपमा ४ लाख ७९ हजार रुपैयाँ लिएको आरोपमा दुई जनालाई नगदसहित पक्राउ गरिएको हो ।
पक्राउ पर्नेमा नुवाकोट जिल्ला सूर्यगढी गाउँपालिका–६ का अजय थापा मगर र विदुर नगरपालिका–९ का हरिराम गिरी रहेका छन् ।
अदालतका अनुसार उनीहरूलाई प्रतिवादीलाई अदालतबाट छुटाइदिने आश्वासन दिई रकम लिएको अवस्थामा अदालत परिसरबाट नगदसहित पक्राउ गरिएको हो ।
घटनाबारे थप अनुसन्धान भइरहेको जनाइएको छ ।
