पौष १०, साओ पाउलो, ब्राजिल ।
ब्राजिलमा विगत २४ घण्टामा ९६१ कोभिड–१९ सङ्क्रमित व्यक्तिको मृत्यु भएको यहाँको स्वास्थ्य मन्त्रालयले बिहीबार जानकारी गराएको छ । यससँगै ब्राजिलमा बिहीबारसम्म कोभिड–१९ सङ्क्रमित एक लाख ८९ हजार २२० व्यक्तिको मृत्यु भएको छ ।
उक्त अवधिमा ४६ हजार ६९६ व्यक्तिमा कोरोनाभाइरस सङ्क्रमण पुष्टि भएको छ भने अहिलेसम्म सङ्क्रमण पुष्टि हुनेको सङ्ख्या ७३ लाख ६५ हजार ५१७ पुगेको मन्त्रालयको तथ्याङ्कमा उल्लेख छ ।
कोभिड–१९ सङ्क्रमणको महामारीबाट अति प्रभावित करिब चार करोड ६० लाख जनसङ्ख्या रहेको ब्राजिलको अति घना सहर साओ पाउलोमा मात्र अहिलेसम्म कूल ४५ हजार ५७६ व्यक्तिको मृत्यु भएको छ भने १४ लाख नौ हजारभन्दा बढी व्यक्तिमा सङ्क्रमण पुष्टि भएको छ ।
साओ पाउलो राज्यमा डिसेम्बरका सुरुका २३ दिनमा नोभेम्बरको सोही अवधिको तुलनामा कोभिडजन्य सङ्क्रमण र मृत्युका घटना बढेका देखिएका छन् ।
कोरोनाभाइरस सङ्क्रमितको सङ्ख्या बढेपछि क्षेत्रीय राजधानी साओ पाउलोमा क्रिसमस र नयाँ वर्षलाई लक्षित गरी डिसेम्बर २५, २६ र २७ तथा जनवरी १, २ र ३ मा बार रेष्टुरेण्टसहितका दैनिक अति आवश्यक सेवा बाहेकका सेवालाई बन्द गर्ने बताइएको छ ।
क्रिशमस र नयाँ वर्षमा नागरिकहरू पर्वमय मानसिकतामा रहने र धार्मिक, साँस्कृतिक तथा सामाजिक क्रार्यक्रमहरूलाई धुमधामका साथ मनाउने भएकोले यसका कारण हुने भीड तथा जमघटले कोभिड–१९ सङ्क्रमण थप फैलिने भन्दै सरकारले ती दिनहरूमा अतिआवश्यक सेवाबाहेकका सेवालाई बन्द गर्ने बताएको हो ।- एजेन्सी ।
