काठमाडौँ । अमेरिकामा भइरहेको आइसिसी पुरुष क्रिकेट विश्वकप लिग-२ अन्तर्गत त्रिकोणात्मक सिरिजको पहिलो खेलमा नेपाल ओमानसँग १३ रनले पराजित भएको छ।

अमेरिकाको टेक्सासस्थित मोसा क्रिकेट मैदानमा ओमानले दिएको २ सय १२ रनको लक्ष्य पछ्याउने क्रममा नेपालले निर्धारित ५० ओभर सकिन २ बल बाँकी रहँदा मात्र १ सय ९८ रन जोड्न सक्यो।

ओमानले दिएको २ सय १२ रनको लक्ष्य पछ्याएको नेपालले ४९.४ बलमा सबै विकेट गुमाउन पुगेको थियो। सुरुवाती राम्रो गर्न नसकेको नेपालका लागि आरिफ शेखले ६६ रनको अर्धशतकीय इनिङ खेले। देव खनालले ३४ तथा रोहितकुमार पौडेलले २० र दिपेन्द्र सिंह ऐरीले १६ रन जोडेपनि नेपालको जितका लागि पर्याप्त भएन।

त्यस्तै, विनोद भण्डारीले १४, सोमपाल कामीले १३, डेब्यु खेलाडी सुनिल धमलाले १२, करण केसीले ८ रन जोडे। ओपनर सुवास खकुरेलले ३ तथा कप्तान सन्दीप लामिछाने २ रनमा पवेलियन फर्किँदा सुशन भारी शून्य रनमा अविजित रहे।

बलिङतर्फ ओमानका जिसन मक्सुद र खवर अलिले ३(३ विकेट लिए। बिलाल खानको नाममा २ विकेट रह्यो। त्यसअघि टस जितेर पहिले ब्याटिङ गरेको ओमानले ५० ओभरमा ८ विकेट गुमाएर २ सय ११ रन जोडेको थियो।

ओमानका लागि जिसन मक्सुदले अविजित रहँदै १ सय ४ रनको शतकीय इनिङ खेले। खवर अलिले ३० रन जोड्दा सोयब खानले २७ रन बनाए। सुरज कुमार १२ रनमा आउट भए। नेपालका करण केसीले ३८ रन खर्चिएर ५ विकेट लिए । करण सोमपाल कामी र सन्दीप लामिछानेपछि एकदिवसीय अन्तराष्ट्रियको एकै खेलमा ५ विकेट लिने नेपालका तेस्रो खेलाडी पनि बनेका छन्।

यस्तै, सन्दीपले २ तथा सोमपालले १ विकेट निकाले। खेल सकिएपछि सञ्चारकर्मीहरूसँगको कुराकानीमा कप्तान सन्दीप लामिछानेले ब्याटिङमा चुक्दा सामान्य लक्ष्य पनि भेट्टाउन नसकेको बताए। उनले आवश्यक बेलामा पार्टनरसीप र रनरेट निकाल्न नसक्नु पनि अर्को समस्या भएको बताए।

उनले भने, ‘हामी ब्याटिङमा चुक्न पुग्यौँ। हामीले पार्टनरसीप राम्रो बनाइरहेको बेलामा विकेटहरू धमाधम गुमाउनु पर्‍यो। हामीलाई जुन बेलामा पार्टनरसीप र रनरेट चाहिएको थियो, उल्टो गरिरहेका थियौँ- त्यो बेलामा। हामीले धेरै बल डट पनि खायौँ। त्यो हाम्रो कमजोरी हो।’

यस हारसँगै नेपाल १३ खेलमा १२ अंक जोडेर छैटौँ स्थानमा रहेको छ। ओमान ३३ खेलमा ४२ अंक जोडेर शीर्ष स्थानमा रहेको छ।

अब नेपालले दोस्रो खेलमा आयोजक अमेरिकाविरुद्ध शनिवार खेल्नेछ। नेपालले तेस्रो खेलमा फेरि ओमानविरुद्ध जुन १४ र अन्तिम खेलमा नेपालले अमेरिकाविरुद्ध जुन १५ मा खेल्ने तालिका रहेको छ।