भक्तपुर । प्राविधिक शिक्षा तथा व्यावसायिक तालिम परिषद् (सिटिइभिटी) का उपाध्यक्ष खगेन्द्रप्रसाद अधिकारीलाई कार्यकक्षमै आएर मोसो दलेर फरार भएका दुईजनालाई प्रहरीले १५ दिनपछि आइतबार पक्राउ गरेको छ।
प्रहरीले अछामको कमलबजार नगरपालिका- ६ घर भई काठमाडौं कलंकी बस्ने ३० वर्षीय डिबी भन्ने डम्बरबहादुर शाही र दार्चुलाको मार्मा गाउँपालिका- २ घर भई भक्तपुर सूर्यविनायक नगरपालिका- २ बस्ने ३० वर्षीय नवराज भट्टलाई हिजो पक्राउ गरेको जिल्ला प्रहरी परिसर, भक्तपुरका प्रहरी नायब उपरीक्षक वसन्त पाठकले जानकारी दिए।
प्रहरीका अनुसार अखिल क्रान्तिकारी आबद्ध उनीहरूले गत फागुन ६ गते भेटघाट गर्ने बहानामा सिटिइभिटीका उपाध्यक्ष अधिकारीको कार्यकक्षमा पसेर मोसो दलेका थिए।
फरार रहेका उनीहरूलाई मध्यपुरथिमि‐३ गठ्ठाघरबाट पक्राउ गरी आवश्यक कारबाही अगाडि बढाएको प्रहरी नायब उपरीक्षक पाठकले बताए। रासस
